Disurat dibuku panurirang Zahkaria, bangso israel mulak sian huta parhatobanon babel. Ditikki diparhatobanon nasida marpuaso do mangingot hasisega huta Jerusalem. Huhut usouso tu malim, angka na di joro ni Jahowa Zebaot dohot tu angka panurirang songon on: Atehe ingkon sai datdatanku dope tumatangis * di bulan sipahalima, jala marpuasa songon na hubahen nasailaon nunga pola martaontaon?.
Angka jolma na dibetel i marpanukkun naeng botoon nasida, marlaku dope masa puasa i? siala nunga dipadenggan be joro ni Tuhan nasega i.
Dipasingot Debata do nasida, puaso i dang naeng tu Tuhan alai tu dirinta sambing do. Puaso, pesta, dohot punguan partondion dang marlapatan molo holan patuduhon ulaon i. Debata mangida roha ta, dang mangida pambahenan portibi sambing.(jaha Yes 58:3–7; Mat 6:16–18).
Debata paingot on angka jolma, asa mangingot angka poda natua tua sijolo jolo tubu. Patuduhon holong naso marloja loja, unang manindos jolma na gale, naso marama marina dohot jolma napogos.
Angka parniulaan partondian marbunga do jala marparbue na denggan molo marurat sian holong na tulus, dohot hasintongan.
Bangso Israel najolo dang tinggil sipareon nasida mambege hata ni Tuhan, roha nasida karas songon batu. On ma namambaen Tuhan marimas tu nasida. Dang mambuka roha mangida dia na tikkos dohot nasala, jala dang ro mangulahon na tikkos i mambaen lam dao nasida sian Tuhan.
Di akka naso marbinege tu hata ni Tuhan, songon i do tong tangiang nasida dan dibege Tuhan. Marbinege jala diulahon, mambuka dalan angka pasu pasu ro tu nasida.
Angka parmingguan, pesta, puasa dohot lan na asing atas goar ni Tuhan dang gabe haporseaon na hot molo dang diuduti pambahenan roha holong na tulus, dang marloja loja, dohot dibagasan hasintongan.
Didok Debata do, dang adong laba na hita manggora "Tuhan.... Tuhan" alai dang olo hita mandalan hon poda na ditongos tu hita. Sada poda na ditongos tu hita ima ro hita mangurupi jolma na gale, on ma sada patuduhon hita mangoloi poda-Na.
Marhite panurirang Zahkaria, dipaboa tu hita haporseaon na togu tubu sian hasintongan, holong, mangida jala mangurupi halak na gale dang sae holan mandok au mar Tuhan alai dang di ulahon poda na di tongos Tuhan i.
Marpungu ditonga tonga bagas ni dongan lunggu, umat lunggu Santo Joseph dang marnaloja marsiajar mambege, manghatahon, mangatusi dongan na. On sada dalan laho mangatusi hata ni Tuhan. Mananda dongan ganup marsada sada, lam hita mamboto hahurangan dohot halobian ni dongan. Marserep niroha mangulahon ulaon na adong di tonga tonga ni lunggu, mangurupi dang manghirim dibalosna jala dang diboto hombar jabu.
Di BKSN na paduahon on, di ondolhon do arta na adong di dirinta boi ma nian dalan pangurupion tu angka dongan na gale. Hapistaran dohot habisukon na adong di dirinta, unang ma gabe dalan mangoto oto i dongan. Hagogoon na adong di dirinta unang gabe dalan manindos dongan na gale.
Marhite BKSN na padua hon on, dipaingot do hita gabe ruas na lam mangatusi lapatani paimbaru hadomuan tu dongan jolma, manghahilalahon pelean situtu tu Debata ingkon do mardongan pambahenan marsilehon lehon tu dongan jolma, lam tarojar ma roha ni ruas i laho pararathon barita nauli marhite na mangalehon pangurupion dohot asi ni roha tu donganna asa rap maduma.
Baca juga: Lunggu St Joseph Stasi Santa Maria Pardugul
Tidak ada komentar:
Posting Komentar
Berikan komentar dengan sopan