BKSN TAHUN 2025 (PERT 1): ZAKHARIA 1:1-6, HAMUBAON DIRI

Debata mampasingot bangso Israel asa mulak nasida sian dalan na, sian angka na jahat dohot sian angka  pambaenan na roa i. Unang be mangulahi angka pambaenan na salah songong angka ompu sijolo jolo tubu, na manundali poda na pinasahat ni Tuhan. Dapotan jambar do nasida na mangulahi pambaenan na salah ni angka ompu sijolo jolo tubu, siala mangolu do hata ni debata diari naung salpu, saonari sahat ro di saleleng leleng na. Marhite pangarimangion sian panurirang Zahkaria 1:1-6 adong piga piga na boi ta parsiajari diparngoluon ta, tarlumobi di bulan kitab suci nasional na di dalan hon umat katolik di bulan september 2025.

BKSN 2025(06/09/25) dibagas A. Yessi Sinaga

1. Marsiajar sian ari naung salpu

Marhite panurirang Zahkaria dipaingot Tuhan do angka sitaonon na bernit di ari naung salpu gabe pasiajaran tu bangso Israel. Unang di ulahi songon pangalahon ni angka ompu nasida siparjolo na marpangalaho na roa jala dang olo manangihon Debata. Di angka ari naung ta dalani, boi do hita mangarimang rimangi hasalahan dohot na denggan naung ta ulahon. Ai di dok do, habisukon tubu sian pardalanan ni ngolu naung di dalan i jala boi mangida dia do sipadenggan on dohot dia do na si tiop on. Sian i do boi hita paubahon pangalahon na so denggan, asa lam denggan. Songon gombaran na metmet di punguan partondion, otik na marsidohot hape godang do halak na. Molo olo hita marsiajar, jala dapot alusna  boasa songoni. Bosir siala godang dang marsidohot ala sai adong na olo manghata i hahurangan ni angka dongan na. Sian i ma hita marsiajar manogihon dongan asa unang manian manghatai diangka na hurang, asa boi dame saluhut umat na adong di punguan i rap marende, martangiang laho mamuliahon Tuhan i.

2. Hamubaon niroha

Manogihon dongan, mangalehon poda manang pasahat on hata ni Tuhan ikkon do parjolo hita sandiri boi mangulahon. Mananda dirinta, sada dalan hita padenggan on na hurang di dirinta. Hamubaon dang ro sian dongan alai sian dirinta, habaranion huhut dang marloja loja marsiajar boi mangarahon hita paluahon na so denggan na adong dibagas dirinta. 

3. Hata ni Tuhan mangolu saleleng ni leleng na

Panurirang Zahkaria paporhot on hata ni Debata, ia angka panurirang i mate do, angka manisia i pe, alai hata ni Tuhan mangolu ro disaleleng ni leleng na. Di dok Tuhan do, Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna!(Mateus 6:33). Harajaon ni Tuhan ima marhite hata-Na na di pasahat marhite na sinurat on angka nabadia i. Dang alani holan sipanganon hita mangolu, alai sian hata na do. Alani i mangolu ma hita siala hata ni Tuhan, ai di jou do hita manisia asa mangulahon lomo-Na. 

4. Marhuaso di diri sandiri, jala mambuka roha tu hata ni Tuhan

Hasesega ni diri dang ro sian dongan na asing, alai tubu sian diri sandiri. Bangso Israel di uhum dang alani bangso babel margogo. Alai roha nasida tartutup tu habonaron na di pasahat Tuhan. Parhatobanon tubu sian hadirion na tartutup manjangkon angka poda nauli. Dang mambuka diri laho pandenggan hon hahurangan, dang manangihon poda jala dang olo mangulaon hasintongan.

5. Hangoluan naimbaru

Bangso Israel mulak sian parhatobanon, manghilala sitaon on di tingki ari naung salpu sada dalan na sian Debata. On ma dalan nasida laho mangarimang rimangi hangoluan naimbaru. Maninggalhon hahurangan, jala mardalan rap dohot Debata. Habisukon ro sian pangarimangon pardalanan ari naung salpu, jala barani paturehon lam tu nadenggan na tu ari sogot. Hita pe jotjot do mambaen hasalaan, gabe dang mardame hita tu dirinta, dibagasan keluarga, dohot di humaliang ta. On mambaen hasusaan do tu hadirion ta. Mambaen hadirion diparhatoban pikiran na sursar. Aha do bosir ni i sude?, Molo holong do roha ta hadameon, ta lului do songon dia asa dame. Alai boi parjolo sahali ro sian dirinta paluahon diia na mambaen na so dame. Hangoluan naimbaru ima na manopoti hasalaan, padenggan on jala dang mulak be tu hasalaan na sarupa diari naung salpu.

Lunggu dibagas Kel. A Yessi Sinaga

BKSN na parjolo on, manogihon asa tong hita marsiajar mangida hahurangan ta, pandenggan on jala unang be mulak tu pudi mangulahon hasalaan i. Anggiat ma marhite BKSN on, dipargogoi Tuhan hita dibagasan parngoluan, di parbisuki mangatusi hata-Na dohot mangulahonsa.

Baca: YESUS datang bagi yang membutuhkan-NYA

Petugas Liturgi Lunggu:

Pemimpin               : A. Chesyl Sitanggang

Ende                       : Inang Mak Frans Br Sipakkar

Doa Permohonan   : Op. Della Br Silalahi, A. Sean