Sidamdam di Raniate Kabupaten Samosir,
Somal ni Lunggu St Joseph marpungu sahali saminggu, siala dibulan september adong sahali misa ni dibagasan lunggu, jadi pembahasan BKSN parpudi dibahas ma diawal Oktober 2025. Namabagasi lunggu mangido di bagas na di ingani hira hira 7 batu ma sian inganan na somal desa Pardugul, sidamdam ma goar ni luat i di raniate samosir.
Taringot tu Paimbaru hadomuan tu Debata
Paimbaru hadomuan tu Debata ima panjouon na porlu tu hita ruas Katolik di tonga-tonga ni portibi naung lam girgir di hadagingon jala mandao sian haporseaon. Dibagasan Malaeki 3:13-18, bangso Israel nunga mulai manarita jala jorgang manghatai tu Debata alana dihailala nasida gabe angka naso mananda Debata do dumenggan ngoluna. Parrohaon na songon on pataridahon naung sega do hadomuan ni jolma tu Debata, pikiran nasida holan tu pardagingon jala ndang dipasangap be Nabadia i.
Paimbaru hadomuon tu Debata tarida patar sian parange dohot pangalaho ni ruas na tutu situtu manghangoluhon haporseaon. Dibagasan turpuk ni panurirang Maleaki, diondolhon do na disurathon Debata do hadaulaton ni angka halak na biar tu Ibana tu "buku parningotan". Lapatanna, diparrohaon Debata do nasa na marhaporseaon jala na marpangoloi di patik-Na. Ruas Katolik na pararathon haporseaonna ima nasida na tongtong gomos porsea tu Tuhan i, atik pe adong sitaonon jala mandao hatigoran i. Dipadenggan nasida do muse hadomuan na mangolu tu Debata marhite tangiang, mangoloi patik-Na, ringgas diangka ulaon parhuriaon, jala dang mahap mangulahon holong dohot hatigoran.
Parbue ni hadomuan naung dipaimbaru dohot Debata gabe pogu ni ulaon hadebataon, ndang holan alani adat hasomalan, tutu ma liturgi i gabe tingki na denggan laho pajumpa dohot Tuhan i. Dibagasan Ekaristi, tangiang, dohot angka sakramen na asing, ruas naung paimbaruhon hadomuanna tu Debata gabe pataridahon bohi ni Huria na marhahomion, gok panghirimon, jala giot pararathonsa. Liturgi gabe inganan na tama laho manghatindanghon holong ni Tuhan i, tarlumobi ala dihilalahon huhut diulahon dibagasan parngoluon siganup ari. Ala ni i, songon parjiarah panghirimon na pararathon haporseaon, diarahon do hita asa jumadihon liturgi songon tanda ni las ni roha alani pasu pasu ni Tuhan i, mual ni haporseaon na mangolu, jala gogo laho papatarhon Harajaon ni Debata marhite holong dohot hatigoran di portibion.
Si putik on parbue sian pembahasan BKSN na paopathon
Marhite BKSN na paopathon on ditogihon do ruas i lam manghilala hinaringkot ni paimbaru hadomuon tu Debata, mangantusi parrohaon dohot parniulaan nasuman laho paimbaru hadomuon tu Debata, jala diparngoluhon ruas angka parbue ni hadomuon tu Debata na dapot dibagasan partangiangan, dohot ulaon nabadia.
Jojot do ta tangi pandohan di humaliang ta mandok, aha ma surung ni hamu na ringgas tu punguan partondion, tu gareja sian angka naso hea. Molo di ida parngoluan, dumenggan do nasida. Alai ditonga tonga lunggu St Joseph, tarlumobi pembahasan BKSN na paopathon on taralusi do sude marhite panjahaion, dohot sian alusni umat i marhite sukkun sukkun na di patolhas.
Marhaporseaon tu Tuhan, dang be tinggil hita tu pandohan na mampadao hita sian ulaon naung denggan. Hita ingot ma na nisurat panurirang Maleakhi ayat 18"Dung i mulak ma rohamuna, jadi idaonmuna ma hasurungan ni halak partigor martimbangkon halak parjahat, hasurungan ni halak sioloi Debata, martimbangkon halak na so mangoloi ibana". Anggiat ma tondi porbadia mandongani angka na mampajonok dirina tu Debata, na marsidohot diangka ulaon ni huria i.
Partogi: A. Bintang Sinurat, Pemandu Ende: Mak Vigra Br Sitanggang, Doa Permohonan: A. Olive Sinurat, A. Yessi Sinaga, Mambagasi Lunggu: Keluarga A. Maris Sigalingging.
Baca Juga:
Tidak ada komentar:
Posting Komentar
Berikan komentar dengan sopan