BAHASA BATAK: PARSIAJARAN SIAN MATEUS 23:1-12: AHA MA SIPASOMALON TU DIRINTA ASA GABE BAKKO NA DENGGAN?

Dang otik jolma na olo mamodai dongan na manang keluarga na, alai ibana sandiri dang olo mangulahon. Adong do tong mangalean pangurupion, asa naeng di ida jolma manang dipuji. Dijaman saonari alani hatop dapot informasi sude diboto, gabe dang tinggil be manangi dongan na.  Ikkon hata na ma ditangi halak. Jala ikkon dipasangap dongan na, alai ibana dang olo pasanganpon dongan na.

Lunggu dibagas Kel. A. Putri Sinurat 23/08/2025

Marhite nabadia Mateus, diajarhon Tuhan Jesus do tu hita marhite parumpamaan na dipasahat tu angka si sean-Na. Di paingot tu hita, unang ma songon halak parise dohot siboto surat i. Di dok angka na denggan sian pamangan na alai nasida dang olo mangulahon, dilehon situhuk on tu dongan na alai nasida pe dang olo manuhuk, aha na di ulahon nasida naeng ma berengon ni na asing, sae naeng mangalului hasangapon tu diri na do nasida.

Pangalaho ni halak parise dohot siboto surat boasa dang boi tiruon ta? hape nasida napistar jala na bisuk do. Pangalaho na dipatuduhon halak parise dohot siboto surat holan naeng habalga on dirina, dang patudohon holong dibagasan tulus ni roha dohot serep ni roha. Dang diboto nasida ise na marhuaso di portibion tarlumobi di hangoluan ganup jolma. 

Dihangoluon on olo dang sadar hita mangulahon songon pangalaho halak parise dohot siboto surat i, alana jotjot ta ida manang dang hita pasomal songon dia mangulahon ulaon dibagasan tulus niroha dohot serep niroha. Adong 3 Songon na boi ta pasomal asa gabe bako di hadirion ta.

1. Aha na ta hatahon, nian boi ma ta ulahon.

Sada natua tua marlasniroha do mangida gelleng na martangiang molo naeng mangan, manang naeng modom. Alai ianakkon mansai las do rohana molo natua tua na rap martangiang dohot nasida. Holong pe tubu, alana dipatuduhon na tua tua na do boi sirappak nasida mangulahonsa dang holan pamangan na mangkata i.

2. Mangulahon na denggan unang asa diboto na deba,

Mampasomal diri mangulahon na denggan alai buni, mangajarhon hita asa unang gabe ginjang roha. Olo do ta patudohn parniulaan na denggan i, dipuji jolma. Diari ari na naeng ro, naeng mangulahonsa dang be sian serep niroha dohot tulus ni roha, alai naeng asa di ida jolma na asing. Jala taingot ma "asa buni angka asi ni roham; jadi baloson ni Amangmu, na marnida di na buni, ma i tu ho!(mateus 6:4)

3. Marserep ni roha di sude parniulaon ta,

Manangi halak na manghatai tu hita, molo adong salah ta barani hita mandok maaf salah do au disi, on si pasomalon laho marsep ni roha. Serep ni roha on ma na gabe dalan manjakkon pasu pasu sian Tuhan i. Didok do (mateus 23:12) "Ai sipaoruon do ganup na patimbo dirina; alai sipatimboon do na paoru dirina". Yakobus 4:6 "Alai lam gumodang do asi ni roha dilehon; ala ni i do didok: “Dialo Debata do angka na ginjang roha, alai dilehon do asi ni roha tu angka na serep marroha!”. 

Diparngoluan on saleleng ni ngolu on dang boi hita maradi marsiajar, boi do hita manangi sian angka na umboto, boi do manjaha angka buku dohot lan na asing. Jala unang lupa mangido pangurupion sian Tuhan i asa  maniroi hita dohot mampargogo i.