SANTA MONIKA: TANGIANG NI SAHALAK INA NA SO MARLOJA LOJA

Tangiang ni sahalak Ina, sada hagogoon na mansai balga naso hea tarida diangka si malolong ni anak na. Nang pe loja di ari ari na di parjampalan, tingki na suda laho mancari, tarlumobi manetek ilu di hasusaan, sada Ina dang hea mattak marsinggang di adopan ni Tuhan. Di husip husip tu Tuhan na, adong tangiang holong na tulus, haporseaon na hot jala panghirimon naso ra mittop.

Keluarga Op. Maris Br Sihaloho

Tangiang tubu sian holong,

Sahalak Ina martangiang dang asa di ida jolma par-Tuhan, dang muse  gabe sada ulaon na rutin alai dan marpanghirimon. Alai tangiang  sada Ina  ro siang holong na bagas maradopon ianakkon na. Sude do ina na marhaporseon tu Tuhan i mangalean dia naumdenggan tu ianakkon na, songon parabiton, sipanganon, dohot inganan modom na lehet. Alai olo do tong dang tarbaen songon dia na binahen ni jolma na asing tu gelleng na. Alai ta ingot ma Ina mansai balga do gogo na mamboan ianakkon na di bagasan tangiang tu adopan ni Tuhan. Hata na di pakaluar sian pamangan na digabasan tangiang ima angka hata holong, panghirimon mangido panjagaion, pangurupion dohot tubu holong dibagasan nasida.

Martangiang naso marnaloja pahot on haporsea on,

Angka ina dang marloja loja martangiang nang pe tangiang na dang mittor dapot na, alai dang muruk nasida disi. Dibagasan hasabaron porsea do nasida Tuhan martinangi di pangidoan ni nasida, diangka ilu na manetek di tingki marsinggang nasida di adopan ni Tuhan i. Di naso marloja loja on ma na gabe pahot on haporseon ni sahalak ina dohot diangka keluarga na. Na gabe hasomalon aha pe na masa, ro nasida marsinggang tu Tuhan i.

Keluarga Op. Hotni Br Sitanggang

Tangiang na so olo mittop,

Santa Monika na gabe sitiruon sada ina naso olo maradi manang gabe mandele dibagasan tangiang na. Mansai leleng martaon taon ibana martangiang dohot ilu asa anakna si Agustinus muba sian pangalaho na so denggan. Nang pe dang muba dope anak na i dang namar naso Santa Monika martangiang . I dang mambaen ibana maradi martangiang, jala tong do marsinggang ibana ro tu adopan ni Tuhan i.

Alus tu tangiang ni sahalak ina na porsea,

Di naso olo loja Santa Monika martangiang, disada tingki Tuhan mangalusi ibana marhite hite anak na Agustinus muba pangalahona gabe si ihut on ajaran ni Tuhan i. Anak na i gabe sada Santo na balga goarna tarlumobi do tonga tonga gareja katholik ima Santo Agustinus. Sian Santa Monika hita boi marsormin tangiang ni sahalak ina dang hea di tulak  Tuhan i. Di angka tangiang na pinasahat dibagasan haporseaon marparbue do ditingki na.

Huaso ni tangiang sahalak ina di parngoluan siganup ari,

Lunggu dibagas ni Op. Pedro Br Sitanggang

Tangiang sahalak ina tu anak na dang dao sian Tuhan,

Jotjot gale pikiran ni sahalak ina molo mangida gelleng na marpangalaho naso denggan. Alai pangalaho gelleng na so denggan i dang mangabbati tangiang ni sahalak ina tu gelleng na i. Nang pe anak nai dang diature hon poda sian natua tua na, sada ina mardalan do dibagas hahomion jala marsinggang di adopan ni Tuhan I laho martangiang tu anak na. 

Tangiang ni ina gabe parjaga dibagasan keluarga,

Tangiang ina dang holan tu angka gelleng na, alai tu saluhut pangisi ni bagas na dohot si solhot na. Di tangiang na metmet, jaloon na do asa Tuhan i parorot hon daging dohot tondi na dohot angka na hinaholongan na, hasehaton, dame di keluarga i, pasu lasu songon tiurni pacarian. Tangiang ni ina manjaga i sada keluarga asa togu haporseaon ni nasida, dang ganggu rohana sian aloggo na manghaororo, dohot gumulussang ni hangoluan.

Boha do gabe ina partangiang,

Mangalehon tikki martangiang,

Sada ina ikkon do loja mangadopi na hombar ditonga tonga ni keluarga, tong do mampasikkop aha na porlu na naeng tu tonga tonga keluarga i. Alai ikkon baen on na ma tikki na lehet, na homi laho pajonokkon diri tu Tuhan marhite martangiang. Pasahat on tangiang sian tulus ni roha umarga do, sian ganjang ni tangiang alai dang sian tulus niroha. Alana tangiang sian roha na tulus umarga do sian hata hata naso marhaporsea on.

Ajari gelleng mu martangiang,

Ina partangiang dang holan pa hot on haporseaon ni keluarga alai tong  ma gabe sitiruon di akka gelleng na. Tikki sada ina papunguhon gelleng na rap martangiang, sada ajar ajar manuan haporseaon na gabe batu mamak di hangoluan ni nasida.

Mangida jala mangihut on serep ni roha Ina Maria Nasohabobohan,

Ina Maria, Ina ni Jesus na gabe sormin mansai uli di angka ina partangiang. Adong pe hasusaan di paradalanan na, digolom do saluhut na jala dipasahat tu Ama i asa anggiat lomo ni roha-Na saut. Ina na marsiajar sian Ina Maria jumpangan na do tangiang na memet alai huaso na mansai balga.

Silehon lehon sian ina tu gelleng na ima tangiang sian tulus ni roha, dang adong na boi mandodo arga ni i. Dang idaon ni gelleng na i songon arta portibi na boi di ida simalolong, alai songon Santa Monika marparbue do tangiang na di tikki na. Tinggil do sipareon ni Tuhan di tangiang ni Ina na ro marsinggang tu adopan-Na, holong-Na umbalga sian saluhut biar na adong di hadirion ni sada ina.