Tarsurat di Matius 25:14-30 Jesus manghatahon sada parumpamaan taringot sada tuan na palumehon artana tu na posona. Dilehon tu sahalak lima bagian, tu sahalak na i dua bagian dohot na asing muse sada dilehon marguru tu gogona ganup. Na manjalo lima bagian dohot na dapotan dua i mangomo do nasida, alai na dapotan nam otik i dang adong di omo siala ai di bunihon do ala ni biarna. Di puji tuan na i do angka na mangomo, alai na mambunihon jala mabiar manang halak na so mangomo i di pasingot.
 |
| Lunggu dibagas Op. Della Sitanggang 30/08/25 |
Parumpamaan i mandok tuan i ima Tuhan, ia naposna ima hita jolma. Arta na di pasahat ni Tuhan tu hita jolma na umbalga ima hasehaton pardagingon, pikiran, dohot tingki. molo ta sukkun tu dirinta nunga mangolu jala adong parbue na dibagasan dirinta?. Molo dung marparbue, boi do diputik di tonga tonga keluarga dohot dihumaliang ta?.
Marhite hite na sinurat ni nabadia Mateus parumpamaan taringot arta na dipalumehon tuan tu angka naposona, boi ma ta tapu piga piga tona na boi hita ida dibagasan dirinta.
1. Arta na adong di dirinta sada pasu pasu na mansai balga.
Ganup jolma ris do dapotan arta sian Tuhan i, nang pe dang sarupa balga na. Alai ikkon ta ingot do, dang alani balga ni arta na di pasahat Tuhan i, ale songon dia hita marbisuk mampature jala pabalgahon. Diangka na marbisuk mampature arta na di pasahat Tuhan i, didok do "Taho ma i, ale naposo na denggan roha jala haposan; haposan do ho di na otik, pasahatonku ma tu ho godang. Bongot ma ho tu halasan ni roha ni tuanmu!". Adong panghirimon arta na naeng di pasahat Tuhan i muse tu nasida.
2. Parngoluhon ma na adong di dirinta, unang mangida na adong di halak na asing
Nunga be hita dapotan arta sian Tuhan i. Antong na adong dihita ta parhaseang ma, asa lam martamba tamba parbuena. Marsiajar hita laho pature ture arta i, unang sanga adong tingki ta laho manghata i na di halak. Asa unang tubu elat, teal dohot late di hadirion, gabe lupa hita arta na adong dihita.
3. Biar mamboan hamamago
Ditikki ro naposona na dapotan sada bagian tu tuan na, ninna ma: Tuannami, nunga huboto hian, ho parroha na pir, na manggotil di na so panuananmu, jala na papunguhon di na so panaburanmu. Jadi ala na mabiar ahu, laho do ahu mambunihon bagianki tubagasan tano; na, ndi on, ugasanmon! Alai ninna indukna i ma mangalusi ibana: Oe, ho naposo na jahat roha jala na losok! Diboto ho do hape, ahu manggotil di na so panuananku jala papunguhon di na so panaburanku! Antong, nda tama ma nian boanonmu hepengki tu sianahi hepeng, gabe jaloonku ma di ahu rap dohot bungana di harorongkon?. Onpe, buat hamu ma bagianna i; lehon hamu ma i tu na mameop na sampulu bagian i!. Ai di ganup paradongan lehonon do, asa marlobilobi ibana. Alai sibuaton do sian na so paradongan nang na di ibana hian. Laos pabali hamu ma naposo na so hasea i tu na holom marimpotimpot! Disi ma masa angguhangguk dohot na patungoripon. Habiar on ta laho marpahaseang arta na adong dirinta, alani losok ni roha manang alani angka alus alus na asing mamboan tu hamamago. Unang ta tiru songon naposo na dapotan sada bagian i, dipasombu ibana arta na adong diri na i dang marhaseang.
4. Dapotan jambarna do diangka na marparhaesang artana, suang songon i naso marparhaseang.
Tangkas do didok tuan na i tu angka na mangomo i, dapotan lasniroha nasida jala tambahon na tu nasida godang. Jala tu na losok roha i dapotan do ibana ima hagolapon ni roha dohot ngolu na haleon.
 |
Lunggu dibagas Op. Della Sitanggang 30/08/25
|
Marhite pangajarion ni Tuhan Jesus on, di lehon do hita sormin sian parumpamaan na diginjang. Ditogihon hita asa marpangoluhon arta na adong dirinta. Asa marparbue na boi putik on ta, ta lehon tu keluarga dohot humaliang ta. Anggiat ma pangajarion on manosoi rohanta, boi mangida arta na adong dirinta, marparhaseang na gabe marparbue na denggan.
Petugas Liturgi Lunggu:
Pemimpin-A. Krisna Sihotang ; Ende-Inang Mak Doan Br Naibaho
Tangiang Pangidoan-Inang Mak Putri Br Siagian, Inang Mak Vigra Br Sitanggang
Tidak ada komentar:
Posting Komentar
Berikan komentar dengan sopan